Нэгэн цагт тариаланч байсан аавдаа зориулж дуу хийлгэх хүсэлтээ хөгжмийн зохиолч Л.Балхжав, яруу найрагч Ш.Гүрбазар ах нартаа хэлсэн юм. Аавын тухай дууг хэзээ ч тийм уран тансаг байх юм гэж төсөөлж байгаагүй.

Нарны садан аав минь
Тариан дундаа бөртийх
Насны хүсэл нь тэнийж
Тавилан заяа нь урамшина хэмээн шүлэглэсэн сайхан уран бүтээл төрөн гарсан.

“Миний аав тариаланч” дуугаа анх дуулж үзэхдээ хөгжмийн зохиолч, яруу найрагч 2 ахыгаа уйлуулаад, хоолойн бичлэгийн үеэр студийн ажилчдыг, дараа нь UBS телевиз дээр клип хийлгэх үедээ орж ирж сонирхсон хүн бүрийг уйлуулж байсан түүхтэй. Аавыг минь сануулах бүх мэдрэмжийг гаргасан учир энэ уран бүтээлдээ дэндүү их хайртай.

Хүний авьяас чадвар үеэс үед дамжин өвлөгддөг. Уртын дуунд дуртай, уртын дууч болох хүсэл дотор минь нуугдан байсан шалтгааныг сүүлд эцэг өвгөдийнхөө түүхийг сонсоод бүрэн ойлгосон юм.

Буурал өвөө минь /эмээгийн аав/ Богд хаант Монгол улсын төрийн дууч, Цогтой гүний хошууны (одоогийн Баянхонгор аймгийн Галуут сум) уугуул, жонон туслагч Цэвээн-Очирын Дандардорж хэмээх тайж угсааны, хэл бичгийн өндөр боловсролтой төрийн түшээ төдийгүй, урлагийн өндөр мэдрэмжтэй авьяаслаг хүн байжээ.

Ц.Дандардоржийн Өлзий /СГЗ/ эгч минь бага наснаасаа ардын урлагт шимтэн суралцаж, манай орны нэрт уран уншигчдын нэг, төв халхын анхны туульч эмэгтэй. Баянхонгор аймгийн Соёлын ордон, Хөгжимт драмын театрын жүжигчин, Монголын зохиолчдын эвлэлийн дэргэдэх Үлгэрийн танхимын жүжигчнээр ажиллаж, урлаг соёлын алтан үеийнхний “Эртний сайхан чуулга”-ын гишүүн явсан арвин түүхтэй.

Язгууртан гаралтай төрийн түшээ, саруул ухаант сайхан хүмүүсийн хойч үе болон мэндэлсэндээ туйлын бахархалтай явдаг.